Hindi totoong diskwalipikado ang Bayan Muna party-list sa halalan sa Mayo 12, 2025, taliwas sa ipinalalabas ng isang Facebook page.
Makikita sa walong posts ng Facebook page na “Kontra Baghak” ang diumano’y balita ng limang news outlets noong Mayo 10, 2025 tungkol sa pagkadiskwalipika ng Bayan Muna sa halalan. Ito ay dahil diumano sa kaugnayan ng nasabing party-list group sa Communist Party of the Philippines-New People’s Army (CPP-NPA).
Kalakip ng mga post ang ilang pekeng screenshot ng diumano’y ulat ng news outlets na ABS-CBN News, INQUIRER.net, Rappler, GMA News, at Philstar.com. Ginaya ang hitsura ng webpage at Facebook page ng mga nasabing news outlet para pagmukhaing sila ang nagbalita nito.
Inilabas ang mga nasabing post labing-isang araw matapos nilikha ang Facebook page noong Abril 29, 2025.
Sa isang Facebook post, pinabulaanan ng Commission on Elections (Comelec) ang mga naturang maling impormasyon at nilinaw na wala silang inilabas na resolusyon para idiskwalipika ang Bayan Muna.
Ayon sa Comelec, ang Bayan Muna ay “opisyal pa rin na kabilang sa listahan ng mga party-list groups na maaaring iboto sa Lunes (May 12, 2025).”
Read the full story on ABS-CBN Fact Check.